باش ساغليغی

۲۰۰۶- جی ايل فئورال آيينين ۱۹- دا خانيم ايراندوخت ابراهيمی نين اؤلوم خبری آذربايجان دموکرات فرقه سی نين بوتون عضولرينی سارسيتدی. اونون وفاتی فرقه اوچون بؤيوک ايتگيدير. بو سارسيلماز مبارز، آذربايجان دموکرات فرقه سی نين مرام و مقصدينين حياتا کئچمه سی اوغروندا سون نفسه دک ايمان و عشق ايله مبارزه آپاردی.

خانيم ايراندوخت ابراهيمی ۱۹۲۵- جی ايلده آستارا شهرينده آنادان اولموشدور. ايراندوخت هله اوشاغيکن آتاسی غنی ابراهيمی، رضا خان ديکتاتوراسينا قارشی مبارزه ده توتوقلاناراق اوزون مدت حبسه ده قالديقدان سونرا سورگون حياتی ياشاميشدير. قارداشی، آذربايجان خالقينين قهرمان اوغلو و ملی حکومتين باش پروکرورو فريدون ابراهيمی و باجيسی ايرج خانيم آتالارينين انقلابی يولونو داوام ائتميشلر.

ايراندوخت خانيم دا بو عائله ده تربيه آلديغی اوچون شعورلا انقلابی مبارزه يه قوشولموش و اونون انقلابی فعاليتی آذربايجان ملی حکومتی دؤورونه تصادف ائدير.

او، ۱۹٤۵- جی ايلده آستارا شهرينده آذربايجان دموکرات فرقه سينين گنجلر تشکيلاتيندا سياسی و اجتماعی فعاليتينی داوام ائتديرميشدير. تاسفله ملی حکومت، قدار پهلوی رژيمی و اونون خارجی حمايه چيلری اولان امپريا دؤلتلری طرفيندن مغلوب ائديلديکده، ايراندوخت خانيم عائله سی ايله بيرليکده آذربايجان رئسپوبليکاسينا مهاجرت ائتميشدير.

ايراندوخت خانيم ابراهيمی اورتا مکتبی مهاجرتده قورتارديقدان سونرا، باکی دؤلت اونيورسيتئتينين تاريخ فاکولته سينده عالی تحصيلاتينی بيتيرميش، تاريخ علملری دوکتورو درجه سينه يوکسلميشدير. او، علمی ايشله ياناشی سياسی فعاليتينی ده داوام ائتديرميشدير. آذربايجان دموکرات فرقه سينين اورقانی اولان «آذربايجان» قزئتينده، آذربايجان ژورناليندا و هابئله باکی مطبوعاتيندا چوخلو علمی، سياسی و اجتماعی مقاله لر يازميشدير.

او، اوزون مهاجرتدن سونرا ۱۹۷۹- جو ايلده ايراندا باش وئرميش بهمن انقلابی نتيجه سينده يئنیدن انقلابی فعاليت ائتمک مقصديله وطنه قاييداراق، تبريز شهرينده آذربايجان دموکرات فرقه سينين قادينلار تشکيلاتينين مسئول کادری کيمی فعاليت ائتميشدير. لاکين، بئش ايلدن سونرا اؤلکه ده يئنی حاکميت طرفيندن دموکراتيک قووه لره قارشی هجوم باشلانديقدا، يئنه ده ايراندوخت خانيم ايکينجی دفعه وطنی ترک ائتمه يه مجبور اولموشدور.

ايراندوخت خانيم بو دفعه ده قارداشی انوشيروانی ايتيرمه سينه باخماياراق (انوشيروان ابراهيمی ۱۹۸۵- جی ايلده ايران اسلام رئسپوبليکاسی طرفيندن اعدام ائديلدی.)، سارسيلماييب سون نفسه دک مبارزه عشقی ايله ياشادی.

آذربايجان دموکرات فرقه سی، ايراندوخت خانيم ابراهيمی نين وفاتی ايله باغلی بوتون فرقه عضولرينه، آذربايجان خالقينا، خصوصی ايله مرحومون عائله سينه درين حزنله باش ساغليغی وئرير، روحو شاد اولسون دئيير.

آذربايجان دموکرات فرقه سی